Со 3R до органско ѓубриво - ПРЕДИЗВИК ЗА МЛАДИ ИСТРАЖУВАЧИ#4 -ЗЕЛЕНИ ПРОЕКТИ
Преку ФОНД ЗА ИНОВАЦИИ И ТЕХНОЛОШКИ РАЗВОЈ на повикот „ПРЕДИЗВИК ЗА МЛАДИ ИСТРАЖУВАЧИ#4 -ЗЕЛЕНИ ПРОЕКТИ“ Во учебната 2021/22, СОУ Гоце Делчев Валандово доби грант за реализирање на истражувачкиот проект „Со 3R до органско ѓубриво“
Целта на истражувањето е да се докаже дека отпадната хартија може да се користи како ресурс во процесот на создавање на органско ѓубриво. Основни ресурси се отпадната хартија од училиштето (на пр. Тестовите, непотребни документи) и растителниот отпад од училишниот пластеник.
Учениците од IV и III година земјоделско- ветеринарна струка и гимназиско образование заедно со 2 професори активно учествуваат во целиот истражувачки процес. Во период од 9 месеци се вршеше мерења на температурата, влажноста и PH нивото на компостот. Самите податоци покажуваат како тече процесот на разградување на компостот. Доколку е премногу влажен се додава сува материја (отпадна хартија), а доколку е сув додаваме зелена маса или вода. Повремено компостот се врши промешување заради аерација или проветрување на истиот.
Сите овие податоци се бележат во табела и на крај ќе послужат за да се докажат хипотезите кои се поставени на почетокот од истражувањето, а тоа е дека од отпадна хартија може да се добие органско ѓубриво.
Ваков вид на проекти се од големо значење во образовниот процес бидејќи учениците преку методологија на истражување и практична работа учат како тече еден истражувачки процес и кои се фазите на истражувањето. Учениците учат како се поставуваат хипотези, како се прибираат податоци, како се бележат и на крај како се анализираат и се проверуваат поставените хипотези.
Учениците преку практичен пример и практична работа полесно усвојуваат знаења кои имаат трајна вредност.
Преку овој проект се набавија компостери, алати (лопати, вили, копачи), транспортна количка, мерни инструменти, заштитна опрема, куќичка за алат, лаптоп, проектор, платно за проектор, принтер, хартија за печетење, тонери и сл.
